​قطعوا الكفين كفّينه - وسهم النايبة ابعينه

يم النهر ظل مطروحْ - وسفه ايجاذب اونينه

​راسه انفضخ بالعامودْ - وابجنبه العلم والجودْ

منه امقطّعة لزنودْ

خيل اوزلم حاطت بيه - وسفه ايجاذب اونينه

​يحيد الدوّخ الفرسانْ - ميّت بالنهر عطشانْ

دنهض ياقمر عدنانْ

لكن ما يردّ اجوابْ - بس ايجاذب اونينه

​يخويه وين كفينكْ - اركبهن ابزندينكْ

وسهم الناشب ابعينكْ

صوّبني ابلبّ احشاي - وسفه ايجاذب اونينه

​يطود الطشّر الصمصومْ - طاح الحمل ياجيدومْ

حاطت بي يخويه القومْ

دقعد عاين أحوالي - وبس ايجاذب اونينه

​وين العلم ياضرغامْ - اوينه سيفك الصمصامْ

مخّك فايض امن الهامْ

ليّه ماترد اجوابْ - وظل ايجاذب اونينه

​حط راسه ابحجره حسينْ - ودمع العين مثل العينْ

وظل يجذب عليه اونينْ

وبو فاضل على التربانْ - وسفه ايجاذب اونينه

​فتّح عينه ابو فاضلْ - ودمه اعلى الوجه سايلْ

يقلّه حملك المايلْ

يبو سكنه من ايشيله - وسفه ايجاذب اونينه

​ايقله بعدك العودة - للمخيّم ترى امچيدة

عضيد اوفاقد اعضيده

ويشوفه بالنهر ممدودْ - وسفه ايجاذب اونينه

​غمّضهن اعيونه اوماتْ - وقام حسين بالحسراتْ

اوصارت بالخيم ضجّاتْ

ابو فاضل بالمسناة - أيا وسفه خفى اونينه