الشيخ عباس الريس

تُعد هذه القصيدة من فن "الرثاء الحسينى" الشعبي (النعي)، وهي مخصصة لذكر استشهاد العباس بن علي (عليهما السلام) عند نهر العلقمي. تتميز القصيدة بأسلوبها العاطفي المؤثر الذي يصور اللحظات الأخيرة بين الإمام الحسين وأخيه العباس، بلهجة عراقية دارجة وسياق شعري يُعرف بـ "المنبر الحسينى"، حيث تركز على تصوير عظم المصيبة وفقد "الكفيل" وما تلا ذلك من انكسار لآل البيت.

رثاء العباس بن علي (عليه السلام) - يم النهر طاح

​طاح، يم النهر طاح

يحسين قوموا من الخيم، عباس شيال العلم

طاح، يم النهر طاح

​ياشبل حيدر ترى اعضيدك وقع فوق الشريعة، منفضخ راسه يبو سكنة وكفينه قطيعة

ضاعت اطفال النبوة عقب عينه فرد ضيعة، مقطوع ليدين والسهم بالعين

والعلم يم جسمه وقع، والجود بالسهم انمزع، طاح...

​وصل يمه ابن النبي ولنه عفير اعلى الوطية، صاح طاح الحمل ياخويه أو وقع بيتي عليه

والحرم ضاعت عقب عينك يبوالنفس الأبية، اتشتت شملنا بعدك أوضعنا

فرهود صارت عيلتي، يا باقي اهلي وعزوتي، طاح...

​ياشهم روع الخيل ابصولته وفرهد العسكر، وزلزل الميدان صوته يوم للميدان سدر

يانجم سعدي الطالع بالدما غاب اوتكدر، ظليت محتار ماعندي انصار

مصرعك دلالي جرح، ياطود عزي وانطرح، طاح...

​وين كفينك يخوية ماترد اجواب ليه، هاي زندينك اقبالي والدما منها جرية

تجر ونة بأثر ونة ليش والونة خفية، من عظم بلواي متفتت احشاي

فتح اعيونك ياشهم، متقوم ترجع للخيم، طاح...

​اشهالسهم لقشر يكافل عيلتي النابت ابعينك، اشهالدما التنزف من اكتارك يخويه على امتونك

اشهالونين اللي فجعني ليش متخفض ونينك، خفف الونات واسمع الونات

زينب وسكنة والحرم، ضجن على سور انهدم، طاح...

​قعد عنده ومسح عن عينه دماه وجذب حسرة، وشال ابواليمه يشيعه راسه وحطه ابحجرة

وخل بيدينه يجمع مخه اويلچم الطبرة، ودمعه ايتجاری وبالقلب ناره

فقد الاخو كسرة ظهر، الله ياجور الدهر، طاح...

​فتح اعيونه ابو فاضل وشاف لن حسين عنده، وشاف راسه ابحجر خيه وزفر زفرة وزاد وجده

وشال راسه للثرى وعفر على التربان خده، وقله يمظلوم والدمع مسجوم

راسك يبن خير الورى، يبقى على حر الثرى، طاح...

​يالاخو بلغ سلامي لزينب وسكنة الحزينة، وقلها عني بالنيابة كافلج قطعوا ايدينه

وانفضخ راسه بعمود وسهم ناشب له ابعينه، وجسمه امتلى جروح بالترب مطروح

حاطت عليه خيل اوزلم، هيهات يوصل للخيم، طاح...

​وبلغوا مني سلامي الوالدة في ارض طيبة، حالها بعدي وبعدك يالاخو حالة عجيبة

ظنتي تبقى ابحيرة من بعدنا وفي مصيبة، تبكي وتنادي راحت اولادي

يم البنين الأربعة، عباس فوق المشرعة، طاح...

​قطع وناته وغمض عينه وخفت صوته الغضنفر، وقام ابواليمه يصك كفه ويصيح الله وكبر

مات كافل عيلتج يختي وبقى اعضيدچ امحير، بالنهر ممدود مقطوع لزنود

صاحت علم عزنا هوى، طب الشريعة ولا ارتوى، طاح...